لما رمينا الكتب جرينا ما لحقناش
مكان ما بين الأمم لينا كيان يتْعَاش
كان هم كل العرب يبنوا حجارة وطوب
فمشينا بالمقلوب جالنا الدمار قشاش
ما تحزنوش من دِوَل كان خبزها حرفين
بنوا فى عقل الولاد طائر وله رجلين
مالكين زمام الأرض ليهم عينين وإيدين
بيصنعوا فى سلاح للحرب ما يتحاش
يا خسارة يا نسلنا قشة فى مهب الريح
والضعف بيهزنا عشان عقولنا صفيح
بيشكلوها لِعَبْ يتسلوا بيها عيال
على أيه تلوم يا خال واحنا لباسنا شاش
العِلْم كان الأمل لو كنا فكرنا
أن الحياة غابة تبلع فى طوب دارنا
وتمص دم الولاد اللى ما لقيوا باب
يفتح عقول مُخُّهُم من غير ما يدي طناش
إقفل جراب دنيتك وافتح كتاب اليوم
وشوف قطارعِلْمهم إزاى هناك بيعوم
يمكن تشوف زيهم وتعدى خطوة هناك
ما تنط م الشباك وتقول هوايا ما جاش
